Путин: Одлуката на Германија во врска со дронот во Лајпциг е уште една голема грешка на Берлин

Рускиот претседател Владимир Путин денеска оцени дека најновите одлуки на германските власти насочени против Русија првенствено се поврзани со внатрешнополитичката ситуација во Германија и тешката положба на германскиот канцелар Фридрих Мерц.

– Што се однесува до постапките на германските власти, мислам дека тие се првенствено последица на внатрешната политичка ситуација. Канцеларот се соочува со политички тешкотии во земјата – изјави Путин на прес-конференција во Бишкек.

Путин одлуките на Германија во врска со инцидентот со дронот на аеродромот во Лајпциг ги нарече „уште една голема грешка“ на германските власти, која, според него, е спротивна на интересите на германскиот народ.

Тој додаде дека германските власти прават „очигледни грешки во економијата“, дека претпријатијата се затвораат и оти животниот стандард опаѓа.

Говорејќи за германскиот канцелар Фридрих Мерц, Путин оцени дека тој не ужива доверба кај својот народ.

– Јасно е и зошто – затоа што не ги штити националните интереси, туку тргува со нив – изјави Путин.

МИА