Рама: Албанија три дена ќе биде центар на Европа

Албанскиот премиер Еди Рама изјави дека неговата земја три дена ќе биде центар на Европа.

-Премиерот на Велика Британија на 15 мај доаѓа во Тирана во билатерална посета, што е прва посета во историјата на шеф на британска влада. Францускиот претседател последен заминува, кој ќе престојува во втора билатерална посета на Тирана, рече Рама.

Додаде дека денеска попладне лидерите на Европскиот совет и на Европската Унија ќе бидат на работна вечера во Тирана со лидерите од регионот на Западен Балкан.

-На 16 мај ќе бидеме домаќини на шестиот Самит на Европската политичка заедница, на кој, ќе учествуваат шефови на држави и влади, заедно со шефови на клучните европски и меѓународни институции. Потоа ќе ја започнеме новата недела со подобар и посилен имиџ, како Европа на Балканот. Тоа ќе биде изворот на сета наша енергија и силата на нашата истрајност уште 4 години по ред, нагласи Рама.

Поради Самитот со одлука на владата 15 и 16 мај се неработни денови за вработените во институциите на државната управа, со седиште на териториите на општините Тирана, Камза, Вора и Круја. Исклучок од оваа одлука се вработените во армијата, полицијата, Националната гарда, противпожарната служба и вработените во здравствениот систем.