Разбиена криминална организација во Грција за нелегално производство и трговија со тутунски производи

Во организирана операција во неколку региони, грчката полиција разбила голема криминална организација, активна во нелегално производство и трговија со тутунски производи, при што биле уапсени 26 лица, откриени три целосно опремени нелегални производствени единици и шест магацини, запленети над 14 милиони парчиња цигари, а избегнатите даноци и такси изнесуваат над седум милиони евра, јави дописничката на МИА од Атина.

Акцијата била спроведена во петокот и саботата, а началникот на Дирекцијата за справување со организиран криминал Фотиос Дуицис и портпаролката на грчката полиција Константина Димоглиду претпладнево детално информираа за акцијата и за криминалната организација активна најмалку од август 2018 година.

Објаснија дека постоела и меѓународната активност и од крајот на септември 2025 година биле регистрирани најмалку 15 испораки на нелегални цигари, а активноста привремено била прекината во октомври 2025 година, откако биле запленети пратки во Романија и Полска, но повторно се активирала во јануари годинава.

Димоглиду посочи дека уапсени се 26 членови на криминалната организација, за случајот дополнително се товарат уште 13 лица, меѓу кои и еден полицаец, а паралелно, се истражува вмешаноста на уште девет лица.

За време на дводневната операција во Аттика, во областа Магнисија, во централна Грција и на Евија биле пронајдени три целосно опремени простории за производство и пакување на цигари, како и погон за термичка обработка и сечење на тутун со специјални машини за оваа намена, како и шест магацини, а запленети се 14.438.040 парчиња цигари, 20,04 тони ситно сечен индустриски тутун, 1.218.082 евра, 24.000 швајцарски франци и 16.050 дирхами, 42 златни лири, оружје, мобилни телефони, компјутери, 17 возила и 10 камиони, три приколки итн.

-За да ја постигнат својата цел, членовите на криминалната организација развиле целосна и повеќеслојна оперативна структура, со нелегални капацитети за преработка на тутун и производство на цигари, главно во делови на Аттика и централна Грција, складишта, како и мрежа за транспорт и пласирање на произведените производи. Произведените цигари се пакувале во лажни пакувања, со знаци и обележја на легални тутунски компании, главно со странски јазични ознаки, рече Димоглиду.

Додаде дека потоа, се префрлале од производствените локации до места за привремено складирање, а потоа се товареле на камиони со приколки и полуприколки со странски регистарски таблички, наменети за други земји-членки на Европската Унија или трети земји, додека дел од производството се насочувал и во рамките на земјата.

Транспортот бил придружен со фиктивни документи, а во некои случаи, возилата носеле лажни регистарски таблички.

Началникот на Дирекцијата за справување со организиран криминал Фотиос Дуицис нагласи дека конкретниот случај е „типичен пример за тоа како организираниот криминал еволуира во модерната ера со структура, времетраење, меѓународни врски и јасни бизнис карактеристики“.