Рубио: Блокадата на Ормуската Теснина еквивалентна на нуклеарно оружје

Американскиот државен секретар, Марко Рубио, ја спореди блокадата на Ормуската Теснина од страна на Иран со „економско нуклеарно оружје“.

Во интервју за „Фокс њуз“ синоќа Рубио рече дека блокадата на клучната поморска рута покажува зошто на Иран не треба да му се дозволи да се здобие со нуклеарно оружје.

„Теснината е еквивалент на економско нуклеарно оружје што тие се обидуваат да го користат против светот, и тие се фалат со тоа“, рече тој.

Рубио додаде дека ако Иран се здобие со нуклеарно оружје, Техеран „ќе го држи целиот регион како заложник“.

Државниот секретар на САД, кој е и советник за национална безбедност на претседателот Доналд Трамп, одби да коментира како би реагирала Белата куќа ако Техеран продолжи да одбива преговори за својата нуклеарна програма.

Од почетокот на војната пред околу два месеци, Иран строго го ограничи преминувањето низ Ормуската Теснина, што доведе до покачување на цените на енергенсите на светските берзи.

САД воведоа поморска блокада врз Иран и во моментот е на сила прекин на огнот, но преговорите меѓу САД и Иран се во застој.

МИА