Русија го тестира Западот, притисокот мора да се зголеми, вели германскиот министер за надворешни работи

Германскиот министер за надворешни работи Јохан Вадефул изјави дека Русија мора да биде под поголем притисок по неодамнешните нарушувања на полскиот воздушен простор и инцидентите во Романија и ја предупреди Москва дека НАТО ќе реагира решително, објави ДПА.

-Русија треба да знае дека секогаш ќе реагираме. Нема да дозволиме да бидеме подложени на понатамошен воен притисок, рече Вадефул во интервју за јавниот радиодифузен сервис ЗДФ. „Ќе ги распоредиме нашите сили, а економските и политичките сили на слободниот свет се моќни“, додаде тој.

Вадефул, исто така, рече дека рускиот претседател Владимир Путин го „тестира“ Западот и нема интерес да ја заврши војната во Украина.

-Тој не прифаќа никакви предлози за преговори. Јасно е дека засега не сака да ја заврши војната во Украина. Тој оди подалеку од тоа и ние мора јасно да одговориме и да останеме обединети, рече Вадефул.

Министерот поддржа построги санкции против Русија, но нагласи дека одбраната на НАТО долж источната граница на алијансата треба да се зајакне, особено системите за воздушна одбрана способни да реагираат побрзо. Тој посочи дека системите што моментално се наоѓаат во Грција и Шпанија би можеле да бидат преместени на источното крило на НАТО.

Дроновите влегоа во полскиот воздушен простор од вторник до среда за време на нападите врз соседна Украина, што предизвика одговор од полските воздухопловни сили и силите на НАТО, кои ги соборија дроновите. Дополнителни инциденти беа пријавени во Полска и Романија во саботата.