Руски авиони упаднаа во Естонија

Естонија вчера објави дека три руски борбени авиони МиГ-31 влегле во естонскиот воздушен простор без дозвола и останале таму вкупно 12 минути. 

- Русија го наруши естонскиот воздушен простор четири пати оваа година, што само по себе е неприфатливо, но најновото нарушување, при што три борбени авиони влегоа во нашиот воздушен простор, е без преседан дрско, изјави министерот за надворешни работи Маргус Цахкна.

Естонската војска објасни дека руските борбени авиони биле пресретнати од италијански авиони Ф-35 со седиште во Емарија, Естонија, како дел од мисијата за воздушен надзор над Балтичкото Море.

- Естонија официјално побара консултации според Член 4 на НАТО во врска со нарушувањето на нејзиниот воздушен простор од страна на Русија, изјави премиерката на земјата Кристен Михал.

Член 4 од договорот ѝ дозволува на секоја земја-членка формално да побара состанок на Северноатлантскиот совет, главното тело за донесување одлуки на алијансата, за да се разговара за понатамошните чекори.

- Руски борбени авиони не го нарушија естонскиот воздушен простор и прелетаа над неутралните води на Балтичкото Море на пат од северозападна Русија кон руската балтичка енклава Калининград, објави руското Министерство за одбрана во раните утрински часови на Телеграм. „Летот беше извршен во целосна согласност со меѓународните правила за воздушен простор без никакво кршење на границите на други држави, што е потврдено со независни проверки“, се вели во соопштението на руското министерство за трите борбени авиони.

„За време на летот, рускиот авион не отстапи од договорената патека на летот и не го наруши естонскиот воздушен простор“, тврди руското министерство.

Литванската министерка за одбрана Довиле Шакалиене рече дека овој инцидент е уште еден силен доказ дека „Источна стража“ долго време е потребна. „Североисточната граница на НАТО е тестирана со причина. Мораме да го сфатиме сериозно“, рече таа.

Таа го спомена и инцидентот од 2015 година кога турските воздухопловни сили соборија руски авион откако Анкара соопшти дека го нарушил турскиот воздушен простор. Турски Ф-16 собори руски Су-24 на турско-сириската граница, при што загина еден член на екипажот, а другиот го спаси. „П.С. Турција даде добар пример пред 10 години. Само да ве потсетам“, нагласи Шакалиене.

Претседателот на САД, Доналд Трамп јасно стави до знаење дека не е задоволен од ситуацијата.

- Не ми се допаѓа. Не ми се допаѓа кога тоа се случува. Може да биде голем проблем, им рече Трамп на новинарите.

Претседателот рече дека Кина е посветена на решавање на украинскиот конфликт и е подготвена да помогне.

- Тој (кинескиот претседател Си Џинпинг) би сакал да ја реши (украинската криза). Мислам дека би сакал да ја види решена, рече Трамп, одговарајќи на прашања од новинари во Белата куќа. „Мислам дека (Си Џинпинг) ќе соработува со нас за да помогнеме во тоа, додаде тој.

Дополнително, Трамп истакна дека САД профитираат од снабдувањето со оружје на Украина.

- Ние не трошиме пари за оваа војна, војната ја финансира НАТО. НАТО купува оружје од нас. Не сакам да профитирам од оваа војна, но всушност ние профитираме од неа, бидејќи нашето оружје го купуваат. Сè е финансирано (од земјите) од НАТО, тие плаќаат за ракети, за тенкови. Прво сè оди во НАТО, а потоа НАТО прави со него што сака“, рече американскиот лидер, одговарајќи на прашања од новинари во Белата куќа.

МИА