Шпанската полиција заплени 1,5 тони кокаин, меѓу уапсените е и еден хрватски државјанин

Шпанската полиција заплени околу 1,5 тони кокаин во градот А Побра до Карамињал, на брегот на северната провинција Галиција, а меѓу тројцата уапсени има и еден хрватски државјанин, објави денеска локалниот весник „Ла Воз де Галисија“.

Кокаинот бил пронајден во објект на имот недалеку од морето, каде што, според досегашните резултати од истрагата, бил привремено складиран.

Галицискиот брег, познат по своите карпести заливи, е едно од важните подрачја за влез на кокаин во Шпанија преку Атлантскиот Океан од Јужна Америка.

Во последните години, истражителите забележале соработка меѓу локалните криминални групи и лица од земјите на поранешна Југославија, вклучувајќи ги Црна Гора, Србија и Хрватска, па сега се обидуваат да утврдат дали некоја од групите од тој регион била вклучена во случајот.

Во саботата, полицијата со часови го пребарувала имотот, а за време на операцијата извршила и проверка на неколку пловни објекти.

Меѓу уапсените е и Р.Р.Г., член на втората генерација на криминалниот клан „Ос Фанчос“ кој со децении е присутен во областа на А Побра, објави весникот.

За време на претресот, полицијата извадила бали со кокаин од објектот. Проценките на истражителите се дека станува збор за околу 1.500 килограми.

МИА