Со викенд населби Ново Село ќе ги подобрува условите за рурален еко туризам

Преку изградба на викенд населби под Беласица Ново Село ќе го развива еко руралниот туризам. За таа цел општината планира продажба на парцели наменети за викенд куќи. Една од населбите се наоѓа во селото Мокрино, а другата во Смоларе. На првата локација се планирани десет, а на втората 24 парцели кои ќе бидат понудени на продажба по пат на јавно наддавање со почетна цена од 1 евро за метар квадратен.

Градоначалникот на Ново Село смета дека со овој проект ќе се отворат и голем број сместувачки капацитети кои претставуваат главен недостаток за развој на туризмот во оваа општина. Според првичните проценки викенд населбите ќе бидат значајни и за зголемување на приходите во останатите дејности поврзани со туризмот.

Во последните неколку години бројот на домашни но и странски  туристи во општина Ново Село континуирано се зголемува.Тие најчесто ги посетуваат водопадите во Смоларе и Колешино и Мокринските извори, но поради немањето сместувачки капацитети наместо неколку дена овде се задржуваат само  по неколку часови.