Сомнеж за труење со храна во ТИРЗ Штип, вработени побарале лекарска помош

Неколку вработени во компанија лоцирана во Технолошко-индустриската развојна зона во Штип синоќа пријавиле здравствени проблеми кои укажуваат на можно труење со храна.

Според првичните информации, повеќе од пет лица почувствувале симптоми како мачнина, повраќање и стомачни болки по консумирање на оброк обезбеден на работното место, дознава М Нет телевизија.

Двајца од вработените, поради влошување на состојбата, побарале лекарска помош и примиле инфузија, додека останатите имале поблаги симптоми,

Неофицијално, храната за вработените ја доставувала фирма од Кочани, а надлежните институции треба да утврдат дали навистина станува збор за труење со храна и што го предизвикало инцидентот.

Очекувањата се дека надлежните служби ќе извршат контроли, а по потреба ќе бидат земени и примероци за лабораториски анализи со цел утврдување на точниот извор на здравствените проблеми.

Повеќе детали се очекуваат по официјалните извештаи од институциите во текот на денот.