Средба на министерот Муцунски со генерална директорка на Светската трговска организација

Министерот за надворешни работи и надворешна трговија Тимчо Муцунски денеска во рамки на работната посета на Женева, во седиштето на Светската трговска организација остварил средба со генералната директорка на оваа организација Нгози Оконџо-Ивеала.

Како што информираат од МНРиНТ, директорката ги поздравила економските и надворешно-трговските политики на Владата поврзани со странските инвестиции, пазарот на трудот, отвореноста на економијата, како и усогласеноста на државата со рамката на Светската трговска организација.

Министерот Муцунски истакнал дека економските реформи се високо на агендата на Владата и ја подвлекол посветеноста на државата за трансформација на економијата, во согласност со побарувачката на пазарот на труд и глобалните трговски пазари. Тој нагласил дека привлекувањето на странски инвестиции е силен приоритет, особено во секторите енергетика, фармација, одбрана и други области каде државата може да покаже високо ниво на конкурентност.

- Силниот ангажман на Владата за привлекување на странски инвестиции, членството во НАТО и целосната усогласеност со заедничката надворешна и безбедносна политика на ЕУ се потврда дека државата е доверлив партнер и атрактивна локација за инвестирање. Ова дава резултати преку зголемен обем на реализирани странски инвестиции и позитивни економски показатели во делот на извозот, потенцирал Муцунски.

Соговорниците се согласиле дека интеграцијата на Западниот Балкан неопходно е да добие поголема динамика, бидејќи, како што се наведува во соопштението, тоа ќе значи реализација на нови стратешки проекти, поголем прилив на инвестиции, забрзан економски развој на државите и отворање пристап до нови пазари за домашните компании.

Министерот Муцунски на средбата говорел и за новите надлежности на Министерството за надворешни работи и надворешна трговија, кое сега е одговорно за процесите, политиките и регулативата поврзани со надворешната трговија. Во оваа насока најави дека активното учество и засилената соработка со Светската трговска организација ќе бидат еден од приоритетите во следниот период.