Станков: Добрата одлука почнува со точна статистичка анализа, затоа е важно користење на официјалните статистички податоци

Податокот само по себе, доколку не е споредлив, не е корисен и разликата меѓу официјалните податоци и сите други податоци е во сигурната методологија којашто се употребува, односно фактот дека квалитетот е испитан, дека се имплементира меѓународна усвоена методологија со соодветни статистички стандарди и податоците се со висок квалитет и споредливи со другите земји, вели во интервју за МИА директорот на Државниот завод за статистика Дејан Станков.

Добрата одлука почнува со точна статистичка анализа, и затоа, посочува Станков, 2025 е прогласена за година на македонската статистика и по тој повод се организираат повеќе настани, активности и работилници со цел да се зголеми свесноста за важноста на официјалните статистички податоци и нивната употреба во носењето на одлуки и стратегии.

Осум децении македонската статистика е сведок на општествените промени, на економскиот раст, на демографските промени, на социјалните текови и на секој обид како држава да изградиме подобро утре, а потврда за квалитетот и усогласеноста на нашите статистички податоци со европските, според Станков, е фактот што тие подлежат и на процес на трансмисија и валидација од страна на Евростат и тоа што сме членка на највисокиот статистички стандард на Меѓународниот монетарен фонд.

Македонската статистика на 1 јуни одбележува значаен јубилеј – 80 години и по тој повод МИА во интервјуто што ќе биде објавено утре разговара со директорот на ДЗС Дејан Станков на повеќе теми, од тоа како се мери инфлацијата и индексот на трошоци на живот, за тоа како ДЗС се подготвува за следниот попис на население и дали дигитализацијата и вештачката интелигенција се сојузник или ривал на статистиката.