Стружани денеска од цистерна полнат чиста вода, матноста на водата од градскиот водовод втор ден во граници на нормала

Граѓаните на Струга денеска имаат можност да наполнат чиста и безбедна вода за пиење од цистерна, која јавното претпријатие „Водовод и Kанализација“ во различен временски интервал ќе ја постави на неколку локации.

Директорот на претпријатието Јованчо Мечкароски оцени дека има голем интерес кај граѓаните да наполнат вода.

- Во моментот имаме само една цистерна која ги исполнува условите. Според однапред утврден план во различни временски интервали цистерната ќе биде поставена кај Општа Болница, Градски пазар, Плоштад на Револуцијата и во населбата „Езерски Лозја“, изјави Мечкароски, нагласувајќи дека стружани и утре ќе можат да наполнат квалитетна вода согласно сите стандарди на наведените локации.

Водата од градскиот водовор во Струга е забранета за пиење повеќе од три недели поради голема матност во изворот во „Шум“ од каде градот и околните села се снабдуваат со вода.

Мерењата на Центарот за јавно здравје вчера и денеска покажуваат резултатати во дозволените вредности и ако и утрешните мостри, односно три последователни се во границите на нормалата ќе биде дадена препорака за тргање на забраната.

Доктор Лидија Симоноска, специјалист по хигиена и здравствена екологија во Центарот за јавно здравје - Охрид информира дека денешните мостри од изворот „Шум“ покажуваат матност од 0,85, а слична е состојбата и во мерните места во градот, од дозволените 1,5 матност.

- И покрај тоа што матноста и во извор „Шум“ и во градот Струга е во граници на нормала, граѓаните нека се стрпат уште малку зашто вредностите на матноста не се постојани, варира од ден на ден, посочува Симоноска.

Општина Струга информираа дека стручните анализи покажале оти изворите „Шум“ и Горна Белица се дел од чувствителен карстен хидрогеолошки систем, во кој секоја површинска интервенција директно влијае врз квалитетот на подземната вода.

- Дополнително, присуството на неконтролирани ископи и депонии од комунален и градежен отпад во сливните подрачја претставува сериозен ризик за квалитетот на водата. Зголемената матност што се регистрира при интензивни врнежи е индикатор дека површинските материи навлегуваат во системот, што бара внимателен и стручен пристап, соопшти Општина Струга. 

МИА