„Тесла“ го претстави новиот „Роудстер“: Забрзува до 100 км/ч за помалку од секунда, лета и се превртува во воздух

Американскиот производител на електрични автомобили „Тесла“ го претстави новиот спортски автомобил „Роудстер“, кој може да забрза од 0 до 96 километри на час за помалку од една секунда, краткотрајно да полета и да изведува акробации во воздух.

На спектакуларна презентација одржана на 15 октомври во Тексас, извршниот директор Илон Маск го демонстрираше долгоочекуваниот електричен суперавтомобил, развиен со технологии од неговата вселенска компанија „Спејс Икс“.

За време на демонстрацијата, автомобилот се искачи по специјално изградена закривена рампа, се движеше наопаку, а потоа се преврте во воздух и безбедно слета на тркалата. Во друг дел од презентацијата, „Роудстер“ накратко полета над неколку возила на „Тесла“.

Овие способности се овозможени со специјален систем од вентилатори што создаваат потисна сила кон подлогата и млазници што користат компримиран гас за контролирање на движењето во воздух.

Особено внимание привлече и забрзувањето. Според демонстрацијата на компанијата, автомобилот достигнува брзина од 60 милји на час, односно околу 96,6 км/ч, за помалку од една секунда.

Сепак, станува збор за прототип, а не за сериски автомобил што веќе може да се купи и користи во секојдневниот сообраќај. Не е потврдено дали сите прикажани способности ќе бидат достапни во комерцијалната верзија.

Новиот „Роудстер“ првпат беше најавен уште во 2017 година, но неговото производство повеќепати беше одложувано. Според најновите најави на Маск, производството се планира за 2028 година.