Топлотниот бран го зголеми обемот на работа во Итната медицинска помош во Струмица

Топлотниот бран го зголеми обемот на работа во итната медицинска помош во Струмица. Мобилните тимови од оваа служба на дневна основа имаат и по 30 интервенции. Освен на терен, зголемување има и на бројот на пациенти во дежурната амбуланта каде само за време на едно дежурство се примаат помеѓу 50 до 70 пациенти. Граѓаните кои бараат медицинска помош најчесто се жалат на чести главоболки, омалаксаност и промена на крвниот притисок.

Во последните неколку денови од струмичката брза помош регистрирале и зголемен број на колапси кои најчесто се случуваат на отворно и во поголеми гужви.

Имајќи во предвид дека високите температури ќе продолжат и во наредниот период лекарите апелираат за  почитување на општите препораки за заштита од топлотниот бран. Потенцираат дека граѓаните треба да бидат посебно внимателни и со консумирањето на храната бидејќи во овој период има и голем број на стомачни вирози и ентероколити.