Велика Британија ќе испрати дополнителни 400 војници во Естонија за зајакнување на источното крило на НАТО

Велика Британија од следната година ќе го зголеми своето воено присуство во Естонија со дополнителни 400 војници, согласно новото одбранбено партнерство со балтичката земја.

Со таквата одлука, бројот британски војници во Естонија ќе се зголеми од 800 на 1.200, почнувајќи од април идната година, а целта е зајакнување на источното крило на НАТО и зголемување на способноста за одвраќање на потенцијални закани.

„Го зајакнуваме нашето присуство во Естонија за да ја заштитиме територијата на НАТО и да ја одвратиме руската агресија“, изјави британскиот министер за одбрана, Ден Џарвис.

Договорот, потпишан во Талин со естонскиот министер за одбрана Хано Певкур, предвидува трансформација на британската борбена група во помобилна противтенковска формација, опремена со модерно оружје, мобилни возила и напредни беспилотни системи.

Според Џарвис, промените ги одразуваат „реалностите на современото војување“ и претставуваат прилагодување на британските сили кон новите безбедносни предизвици.

Певкур оцени дека однапред распоредувањето опрема и муниција ќе овозможи значително побрза реакција во случај на криза. Двете земји договорија и поголема соработка во развојот на нови воени технологии. 

Британски војници се присутни во Естонија од 2016 година, како дел од мисијата „Cabrit“ во рамките на обврските на НАТО. 

МИА