Вучиќ распиша вонредни парламентарни избори на 25 октомври

Претседателот на Србија, Александар Вучиќ, го потпиша Указот за распуштање на српскиот Парламент и одлуката за распишување вонредни парламентарни избори на 25 октомври.

Во Указот се наведува дека се распушта Собранието на Србија избрано на 17 декември 2023 година.

Тој ја донесе одлуката врз основа на образложениот предлог на Владата на Србија од 7 септември. Претседателот Вучиќ објави, зборувајќи од Претседателството на Србија, дека уредбата стапува на сила на денот на објавувањето во Службениот весник на Република Србија.

Во своето обраќање до граѓаните, Вучиќ рече дека одлуката за распишување избори ја донел „врз основа на виталните интереси на државата и граѓаните на Србија“.

„Да не беа ваквите тензии и политички несогласувања и конфликти, сигурно немаше да ни требаат избори, но секое одложување би го загрозило Експо и опстанокот на демократијата како најдобра форма на политички режим во нашата земја“, рече Вучиќ во обраќањето од Претседателството на Србија.

Премиерот Ѓуро Мацут предложи распуштање на Собранието на седницата на Владата на 7 септември, што Владата го прифати на седница. Тоа беше неопходна законска постапка, за да може Вучиќ да распише избори.

Од моментот кога Владата го прифати предлогот на Мацут за распуштање на Собранието, почна да тече рок од 72 часа, во кој претседателот на Републиката одлучува дали ќе го прифати образложениот предлог на Владата.

За да се одржат изборите на 25 октомври, како што претходно објави Вучиќ, тие мораа да бидат распишани најдоцна на 10 септември.

Тоа ќе бидaт 15-ти по ред од воведувањето на повеќепартискиот систем и 11-ти вонредни.

МИА