Заврши истрагата за несоодветното чување на доверливите документи од страна на Бајден

Специјалниот советник на американското Министерство за правда за несоодветното чување на доверливи документи од страна на претседателот Џо Бајден ја заврши истрагата и наскоро се очекува негово објавување, изјави американскиот јавен обвинител Мерик Гарланд.

Тој во писмото испратено до конгресмените не ги елаборира наодите од извештајот на специјалниот советник Роберт Хур.

Гарланд истакна дека извештајот ќе биде објавен веднаш штом Белата куќа ќе го заврши прегледот на документот за евентуални приговори поврзани со откривање на доверливи факти, а се очекува постапката да биде завршена до крајот на неделата.

Истрагата почна пред една година поради незаконското чување на Бајден на доверливите документи од времето кога тој беше сенатор и потпретседател.

Доверливи документи беа пронајдени во домот на Бајден во Далавер и во неговата приватна канцеларија. Извештајот од истрагата ќе биде објавен во деликатен момент за Бајден, кога тој се бори за реизбор.