Злато и пет бронзи на нашите таеквондисти на Меѓународниот турнир одржан во Солун

Една златна и пет бронзени медали освоија нашите репрезентативци на меѓународниот „Таеквон-до ИТФ“ натпревар во традиционално теаквон-до што деновиве се одржа во Солун.

Во исклучително силна конкуренција на 1239 натпреварувачи од 17 земји од целиот свет, Миа Танеска го освои златното одличје, додека со два бронзени медали во категориите У-18, форми и борби се закити Теодора Митреска, а бронзени медали освоија во сениорска конкуренција и Божидар Димитриевиќ и Марио Крстески.

„Миа Танеска која е една од нашите помлади натпреварувачки и само пред неколку дена наполни 12 години со што влезе во повозрасна категорија, кадетки 12-13 години, иако најмлада во категоријата докажа дека вреди во неа да се вложува, повторно искачувајќи се највисоко на пиедесталот со пет победи осовјувајќи го златениот медал во форми и со две победи над домашни претставнички освојувајќи бронзен медал во борби. Со освојувањето на двата медали во двете дисциплини го доби и пехарот за најдобра кадетка 12-13 години“, изјави претседателот на Македонската традиционална Таеквон-до федерација, Марјанчо Лазаревски.

Боите на Македонија во Солун ги бранеа осуммина натпреварувачи од клубовите ТК “Хва Ранг ИТФ” од Лескоец - Охрид, ТК „Мастер” од Охрид, ТК “Сонкал” од Мислешево - Струга и ТК “Ахилиус“ од Скопје.