200 метри кубни отпад собран во „Генералка викенд“ во Скопје

Околу 200 метри кубни отпад само во главниот град биле собрани во рамки на акцијата Генералка викенд која се одржуваше во текот на минатата недела. Информацијата ја потврди скопското јавно претпријатие комунална хигиена.

Се чистеше на Кејот на реката Вардар, опфаќајќи ги двете страни на речното корито, при што стотици учесници во акцијата собираа најразлични видови на непрописно одложен отпад од брегот и пешачките патеки. Паралелно, активностите се реализираа и во сите скопски општини, каде што граѓаните и волонтерите го одлагаа собраниот отпад на претходно определени пунктови, најчесто во близина на училишта и градинки.

По завршувањето на акцијата, екипите на ЈП Комунална хигиена-Скопје го презедоа и транспортираа отпадот од сите локации, како што веќе објавивме, вкупно 200 метри кубни.