Активни три пожари на отворен простор од вкупно 20 пожари

Центарот за управување со кризи попладнево информира дека до 18:30 часот на цела територија на државата активни се три пожари, а под контрола се шест пожари. Вкупно имало 20 пожари од кои 11 се изгаснати.

Активен е пожарот на планината Готен и Малешевските планини каде гори нискостеблеста шума, смрека, грмушки и ниска вегетација, како и пожарот кај селото Бешиште во општина Прилеп со крак кон селото Градешница во општина Новаци и крак кон границата со Грција. Третиот активен пожар е меѓу селата Царевиќ, Смолани, Радобил и Дрен во општина Прилеп и Галиште и Трстеник во општина Кавадарци.

Директорот на Центарот за управување со кризи Стојанче Ангелов денеска на прес-конференција најави дека во гаснењето на пожарот на планината Готен ќе биде ангажиран и чешки хеликоптер и пожарникари од Словенија, а помош понудиле и Австрија и Франција. 

МИА