Битолчанец не се отрезнил два дена, го фатиле со 3,23 промили па за 30 часа со 3,50 промили алкохол во крвта

На 29-годишен битолчанец му е одреден осумдневен притвор откако полицијата за помалку од 30 часа двапати го затекнала како управува автомобил под силно дејство на алкохол.

Првиот пат Х.Ј. бил запрен на 7 ноември, околу 21:30 часот, на паркингот кај спортската сала „Боро Чурлевски“ во Битола. Тој управувал автомобил „Мерцедес“ со битолски регистарски таблички, а алкотестот покажал 3,23 промили алкохол, по што бил приведен.

Но, тоа не го спречило повторно да седне зад воланот. На 9 ноември, во 02:41 часот, полициски службеници повторно го запреле истиот возач, овојпат на улицата „Партизанска“ во Битола.

При повторното алкотестирање биле измерени уште повисоки 3,50 промили алкохол, по што 29-годишникот по вторпат бил лишен од слобода.

По целосното документирање на двата случаи, на битолчанецот му е одредена мерка притвор во траење од осум дена.