Дваесет и еден кандидат за нов македонски судија во Судот во Стразбур

Министерството за надворешни работи и надворешна трговија информира дека на јавниот повик за избор на кандидати за судија во Европскиот суд за човекови права во Стразбур, заклучно со 29 април годинава, пристигнале вкупно 21 апликација.

Меѓу кандидатите, како што објавија некои од медиумите, има судии, обвинители, адвокати.

- Во наредниот период, Меѓуресорската Комисија формирана со одлука на Владата на Република Северна Македонија, ќе ги разгледа пристигнатите апликации, ќе изврши интервјуирање на кандидатите и ќе пристапи кон процес на нивно рангирање, со цел предлагање на тројца кандидати до Советодавниот панел на експерти за избор на судии при Советот на Европа, согласно член 22 од Европската Конвенција за Човекови права (ЕКЧП), информираат од МНРиНТ.

Процесот на селекција, како што посочуваат од МНРиНТ, ќе се спроведе во согласност со утврдените критериуми и процедури, со цел обезбедување на транспарентност и објективност при изборот на најсоодветните кандидати за оваа значајна позиција.

Од 2017 година македонскиот судија во Европскиот суд од земјава е Јован Илиевски.

Деветгодишниот мандат на новиот судија ќе почне на почетокот на 2026 година.