Фалангата со Македонска песна по 2 400 поминати километри со автобус стигна во Данска

На два дена пред почетокот на Европското првенство во Данска, кога нашите ракометари ги одработуваа последните подготовки за она што ќе следува вечерва во Хернинг, Данска, од Скопје на пат тргнаа најверните македонски навивачи – осмиот играч на ракометната репрезентација.

Екипата полека се екипираше и со автобус го започна своето долго патување. Тргнувањето за Данска се поклопуваше со стара-нова година и празникот Василица, па истото започна со традиционалното кршење лепче, а среќниот добитник на паричката доби задача следната година, на пат кон Германија, на уште едно Светско првенство, да го организира заедничкото одбележување.

Освен кршењето лепче, ниту патот за Данска не можеше да помине без квалитетна македонска ракија, салата и традиционална македонска храна, а сето тоа надополнето со македонска песна.

Како што поминуваше патот, така растеше и еуфоријата за претстојното првенство, се менуваше репертоарот на песни, но атмосферата остануваше на високо ниво.

Голем дел од фалангата ја следи Македонија на речиси секое натпреварување. За Данска тргнуваат со позитивна мисла и желба за добар резултат и радост и на теренот и на трибините.

Долгото патување бараше и соодветни паузи и застанувања, а на патот од Македонија, преку Србија, Унгарија, Словачка, Чешка, Германија и Данска, секаде се слушаше македонска песна.

По 18-часовно патување, првата епизода ја завршивме во Прага, преубавиот чешки град, каде што ја поминавме ноќта, за следниот ден да тргнеме за Данска.

Ноќта помеѓу 15 и 16 поминавме нови 1.000 километри од Прага до Архус, повторно во одлична атмосфера и со последни подготовки за репертоарот на песни за вечерашната средба.

Фалангата сега жива и здрава е во Архус, од каде што вечерва ќе се упати за Хернинг, каде што ќе се игра вечерашниот натпревар Данска – Македонија, со почеток од 20:30 часот.

Од Данска – Кирил Стојанов