Грција: Завршува потрагата по преживеани во железничката несреќа

Грчките спасувачи денеска ја завршуваат потрагата по преживеани по трагичниот директен судир на патнички воз со товарен воз во клисурата Темпи кај градот Лариса, во кој загинаа најмалку 57 лица, а десетици луѓе беа повредени.

Тагата на грчкото општество за жртвите од несреќата на 28 февруари се претвора во гнев, пренесе Ројтерс.

Околу 2000 студенти синоќа протестираа во Атина, а имаше и судир со полицијата. Студентски протести се одржаа и во Солун и Лариса.

Синдикатите на железничарите, кои од средата штрајкуваат, тврдат дека оваа несреќа била неизбежна поради немањето безбедносни системи и недоволниот број вработени.

Тие бараат од грчката влада јасен рок за спроведување на безбедносните протоколи.