Хуманитарен настан посветен на Јорданчо Џамов и загинатите во „Пулс“ во Кочани на 15 јуни

Здружението на хумани граѓани „Јорданчо Џамов“ организира голем хуманитарен настан кој ќе се одржи на 15 јуни во 19:00 часот, во Градскиот парк во Кочани.

Настанот е посветен на Јорданчо Џамов и загинатите ангели, а има за цел да ја промовира хуманоста, заедништвото и поддршката кон семејства од ранливи категории.

Според организаторите, сите собрани средства ќе бидат наменети за изградба на спомен-обележјето „Патека на бесконечноста“, како и за директна помош на семејства кои имаат потреба од поддршка.

Во рамките на програмата е предвидена и модна ревија во соработка со Универзитетот „Гоце Делчев“ – Штип, како и продажба на фустани, при што целиот приход ќе биде насочен кон хуманитарната цел на настанот.

Настанот ќе биде збогатен и со музичка програма, а организаторите упатуваат отворена покана до сите граѓани да присуствуваат и да придонесат за заедничката хумана мисија.

„Ве очекуваме заедно да испратиме порака на хуманост, почит и надеж“, стои во поканата од организаторите.