Иран предупреди на масовен одговор по заканите на Трамп за напади врз критичната инфраструктура

Иран предупреди дека ќе возврати со масовни напади доколку САД ја нападнат критичната инфраструктура на земјата, откако американскиот претседател Доналд Трамп претходно се закани со удари врз иранските енергетски и инфраструктурни објекти.

Во соопштението што денеска го пренесе иранската новинска агенција „Фарс“, Централниот штаб „Хатам ал-Анбија“ наведе дека секој таков напад ќе ја направи инфраструктурата на Блискиот Исток легитимна цел за иранските сили, јави ДПА.

Иран и претходно, во периоди на зголемени регионални тензии, изведуваше напади врз енергетски постројки и цивилна инфраструктура во соседните земји кои се сојузници на САД.

Во интервју за „Фокс њуз“ во вторникот вечерта, Трамп изјави дека американските сили ќе продолжат „многу силно“ да го напаѓаат Иран сè додека тој не оцени дека „е доста“.

– Следната недела за нив ќе биде навистина лоша, бидејќи на ред доаѓаат електраните. Потоа мостовите. Ќе ги уништиме сите нивни електрани и мостови, освен ако не седнат на преговарачка маса, рече американскиот претседател.

МИА