Историски чекор за Иџе: Прв возач од Балканот со прототип „Норма“, само 12 вакви болиди во светот

Европскиот автомобилски шампион Игор Стефановски – Иџе започнува ново поглавје во својата богата тркачка кариера. По низата европски титули и бројните успеси на ридските патеки, македонскиот возач оваа сезона ќе настапува со прототип болид „Норма“, во најмоќната и најпрестижната класа во ридскиот автомобилизам.

Со овој чекор, Стефановски станува првиот возач од Балканот кој ќе настапува со ваков прототип на официјални меѓународни натпревари. Болидот „Норма“ е исклучително редок – според Стефановски, во светот се произведени само 12 вакви возила.

„Отворам ново поглавје во мојата кариера. За овој момент сонувам цел живот. Ќе бидам првиот возач од Балканот кој ќе настапува со прототипот Норма, еден од само 12 вакви болиди произведени во светот“, изјави Иџе.

Тој посочи дека станува збор за исклучително моќен прототип, чија технологија и перформанси се блиски до оние на болидите во Формула 1.

Новиот автомобил Стефановски го тестира на Водно, симболично место за неговата кариера, каде што започнала неговата тркачка приказна.

„Со овој болид влегуваме во нова категорија, со исклучително силна и бројна конкуренција. Верувам дека и во оваа класа ќе бидеме конкурентни и ќе се бориме за нови подиуми на европските ридски трки“, додава Стефановски.

Прототипот е конструиран исклучиво за натпреварување и се одликува со ултралесна шасија, одличен однос меѓу тежината и силата и напредна аеродинамика, што овозможува високи перформанси на планинските патеки.

Со преминот во оваа категорија, Игор Стефановски – Иџе прави уште еден значаен чекор во кариерата и ја носи Македонија во највисоката класа на европските ридски натпревари.