Истражување: Повеќето граѓани на ЕУ не ги сметаат САД за доверлив партнер

Повеќето граѓани на Европската Унија не ги сметаат Соединетите Американски Држави за доверлив партнер, покажува студијата базирана на анкети спроведени во сите 27 земји-членки, пренесе ДПА.

Според анализата на фондацијата „Бертелсман“, раководството на Доналд Трамп остава длабоки последици врз перцепцијата на граѓаните. Истражувањето, спроведено од институтот „Нира Дата“ во март, опфатило повеќе од 18.000 лица.

Резултатите покажуваат дека 58 проценти од граѓаните на ЕУ сметаат дека САД не се доверлив партнер. Во Германија овој процент е уште повисок и изнесува 73 отсто. Само 31 процент од испитаниците ги сметаат САД за најважен партнер на ЕУ, што е пад од 20 процентни поени во споредба со септември 2024 година, кога овој став го споделувале 51 отсто од анкетираните.

Речиси три четвртини од испитаниците (73 проценти) сметаат дека Европа треба „да тргне по свој пат“ по децении блиски односи со Вашингтон.

Истовремено, скептицизмот кон Кина останува висок, додека Обединетото Кралство и Канада се доживуваат како стратешки партнери со сè поважна улога.

Поддршката за НАТО и натаму е силна, при што 63 проценти од испитаниците ја сметаат Алијансата за централен столб на безбедноста.

МИА