Кривична против полицаец од скопски Аеродром - не извршил пасошка контрола на лице со мерка „апси“

Одделот за внатрешна контрола, криминалистички истраги и професионални стандарди при МВР поднесе кривична пријава против полицискиот службеник С.С. поради сомневање за сторено кривично дело „несовесно работење во службата“ по член 353-в од Кривичниот законик.

Според информациите, на 12 август 2025 година, при вршење на должноста „полицаец“ во Полициската станица за граничен премин „Меѓународен аеродром Скопје“, осомничениот не извршил пасошка контрола на патник кој се наоѓал на СТОП-листата на МВР со активна мерка „апси“. Со тоа му овозможил непречен влез во државата, го ставил во поволна состојба, а истовремено нанел штета на угледот на Министерството за внатрешни работи.

По добиена согласност од Основното јавно обвинителство за гонење на организиран криминал и корупција – Специјализираното одделение за дела сторени од лица со полициски овластувања и припадници на затворска полиција, Одделот за внатрешна контрола ќе поднесе предлог за поведување постапка за утврдување одговорност.

Како дополнителни мерки, предвидено е одземање на службеното оружје, задолжителен психолошки и психијатриски преглед, како и суспензија од работното место.