Кривична за 18 годишна девојка и две малолетнички за насилството во Куманово

СВР Куманово поднесе кривична пријава П.А. (18)  од село Лојане, општина Липково, како и против две малолетнички девојчиња на возраст од 14 и 15 години од Куманово, поради сомнение дека сториле кривично дело „насилство“ согласно член 386 став 3 од Кривичниот законик.

Според информациите од полицијата, инцидентот се случил на 13 март 2026 година околу 18 часот. Осомничените повикале 14-годишно девојче да излезе од нејзиниот дом, по што ја убедиле да влезе во просторија во близина на спортскиот центар „Соколана“ во Куманово.

Таму најпрво ја навредувале, а потоа физички ја нападнале, при што целиот напад го снимале со мобилен телефон.

По нападот, според пријавата, осомничените ѝ се заканиле на малолетничката да не го пријавува случајот и да не зборува за видеото, предупредувајќи ја дека во спротивно ќе ѝ се случи нешто уште полошо.

Против осомничените е поднесена кривична пријава, а случајот ќе добие понатамошна судска постапка.