Маск: Жалам што некои објави за Трамп отидоа предалеку

Милијардерот Илон Маск изјави дека жали за некои од објавите што ги направил за американскиот претседател Доналд Трамп за време на нивната вербална војна на социјалните мрежи.

„Жалам за некои од моите објави за претседателот Доналд Трамп минатата недела. Тие отидоа предалеку“, рече тој на својата платформа X.

Двајцата беа вмешани во јавна расправија, откако сопственикот на Тесла го нарече даночниот закон на Трамп „одвратна гнасотија“.

Неговата објава доаѓа откако Трамп изјави дека нивната врска е завршена и дека нема интерес да ги поправи односите со Маск.

Буџетот, кој вклучува огромни даночни олеснувања и поголеми трошоци за одбрана, беше усвоен од Претставничкиот дом минатиот месец, а сега го разгледуваат сенаторите.