Мерцедес излетал од автопатот „Пријателство“ и влетал во двор на куќа, двајца тешко повредени

Двајца мажи се тешко повредени откако автомобил „мерцедес“ излетал од автопатот „Пријателство“ и завршил во дворно место на семејна куќа во близина на скопското село Трубарево.

Според информациите од МВР, несреќата била пријавена денеска во 01:10 часот. Возилото, со скопски регистарски ознаки, го управувал 33-годишен жител на селото Батинци, кој ја загубил контролата и излетал од коловозот.

Во несреќата тешки телесни повреди добиле возачот и неговиот 39-годишен сопатник од Скопје. Повредите биле констатирани во Ургентниот центар при Клиничкиот комплекс „Мајка Тереза“.

Увид на местото на несреќата извршила екипа на СВР Скопје.