Мета затвори над 750.000 профили во Австралија по забраната за пристап до социјалните медиуми за лица под 16 години

Мета денеска соопшти дека отстранила помеѓу декември и јуни повеќе од 750.000 сметки на Инстаграм и Фејсбук за кои се сомнева дека им припаѓаат на корисници во Австралија под 16 години, пред и по стапувањето во сила на забраната за социјалните медиуми во Австралија за таа возрасна група.

Мета соопшти дека деактивирала 462.000 сомнителни сметки на Инстаграм и 294.000 сметки на Фејсбук.

Во јануари, компанијата соопшти дека дотогаш отстранила 331.000 сметки на Инстаграм и 173.000 сметки на Фејсбук. Забраната за социјалните медиуми за лица под 16 години стапи во сила во Австралија на 10 декември и беше воведена поради загриженост за влијанието на социјалните медиуми врз физичкото и менталното здравје на децата и младите. Мета изјави дека сака да се придржува до законот, иако, како и другите платформи, претходно се спротивстави на него.

Австралискиот регулатор за интернет разгледува опции да преземе мерки против платформите за кои верува дека не презеле доволно мерки за спроведување на забраната.
Како резултат на тоа, австралиската влада ја зголеми максималната казна за прекршување на законот на речиси 70 милиони американски долари и му даде на регулаторот поголеми овластувања за прибабување документи.

Податоците од австралиската влада и повеќе независни студии покажаа дека повеќе од осум од 10 лица под 16 години сè уште користеле социјални медиуми во текот на првите три месеци од забраната. 

МИА