Бизнис
16. November 2026 - 15:28

МФ: Јавниот долг во 2027, во согласност со ревидираните податоци за БДП, нема да го надмине прагот од 60%

Јавниот долг заклучно со третиот квартал годинава, според податоците од Министерството за финансии, изнесува 10 милијарди 930 милиони евра или 56,6 проценти од БДП.

До крајот на годината, во согласност со сегашните проекции, би требало да изнесува 11.250 милиони евра или 58,2 проценти од БДП, а државниот долг да биде 51 процент.

Министерката за финансии Гордана Димитриеска-Кочоска уверува дека јавниот долг в година нема да го надмине прагот од 60 проценти од БДП.

Во согласност со ревидираните податоци за БДП, пресметките на Министерството за финансии покажуваат дека јавниот долг в година би изнесувал 12 милијарди 300 милиони евра или изразено во проценти 59,7 проценти од БДП. 

Долговите што ги прават општините и јавните претпријатија на локално ниво, според министерката за финансии, не може да бидат јавен долг.

- Зборуваме за децентрализација. Тоа се нивни долгови - децидна е министерката за финансии.

Во однос на средствата што од централниот буџет се слеваат во Фондот за пензиско и инвалидско осигурување за исплата на пензии, министерката информира дека 42 милијарди денари одат за да се пополни буџетскиот дефицит во ПИОМ.

Од Министерството велат дека е готов и проспектот за граѓанска обврзница, која се очекува да биде издадена во текот на месецот.

 

МИА