Мицкоски: Инвестираме во модернизација на институциите и подобри јавни услуги

Владата инвестира во модернизација на институциите преку набавка на нови возила за потребите на здравството, царината, комуналните служби, Македонска пошта, полицијата и Армијата, објави премиерот Христијан Мицкоски на својот фејсбук-профил.

Како што наведува Мицкоски, предвидени се 100 нови амбулантни возила за македонското здравство, 26 специјализирани возила за модернизација на царината со поддршка од Европската Унија и 65 мултифункционални комунални возила.

Покрај тоа, планирани се 100 нови возила за потребите на Македонска пошта, 120 за македонската полиција и 124 возила за потребите на Армијата.

-Како Влада, инвестираме во модернизација на институциите, подобри јавни услуги и поголема безбедност за сите граѓани. Се грижиме за потребите на граѓаните и градиме посилна, поефикасна и современа држава – наведува Мицкоски во објавата.