Најмалку 13 загинати во земјотресот во Јапонија, потрага по преживеани под урнатините

Во земјотресот со јачина од 7,1 степен што вчера го потресе подрачјето во близина на градот Кумамото загинаа најмалку 13 лица, а спасувачите итно трагаат по преживеани заробени под урнатините, изјави денеска јапонската премиерка, Санае Такаичи.

„Се уште има луѓе кои чекаат да бидат спасени и ова е трка со времето. Ќе ги искористиме сите расположливи средства на терен за да спасиме и извлечеме што е можно повеќе луѓе“, изјави Такаичи пред новинарите во нејзиниот кабинет во Токио.

Земјотресот остави илјадници домаќинства без електрична енергија и оштети патишта низ целиот регион. Спасувачките екипи рано изутринава извлекле осум лица од урнатините на делумно урнат трговски центар.

Две жени во дваесеттите години загинале откако, според првичните информации, експлозија од непозната причина разнела дел од центарот околу еден час по земјотресот.

Локалните медиуми објавија дека властите ја истражуваат можноста за експлозија на гас.

Целосните размери на катастрофата се уште не се познати.

Епицентарот на земјотресот бил на околу 20 километри јужно од градот Кумамото, најголемиот град во централниот дел на островот Кјушју, на кој има околу 700 илјади жители.

Властите ги предупредија жителите на најпогодените подрачја да бидат подготвени за можни силни последователни потреси во текот на следната недела, како и за опасност од лизгање на земјиште.

Поради фактот што повеќе од 36 илјади домаќинства се уште се без струја, властите се загрижени поради ризикот од топлотен удар, бидејќи во средата се очекуваат температури околу 34 степени Целзиусови.

Неколку патници во брзи возови кои во моментот на земјотресот се наоѓале во нив, исто така биле повредени, соопштија железничките оператори.

Најголемо внимание привлече ситуацијата во трговскиот центар „Aeon“, најголемиот во префектурата, каде цела страна на објектот со околу 200 продавници, беше целосно разнесена од силна експлозија.

Портпаролот на компанијата „Aeon“ изјави дека купувачите и вработените биле евакуирани веднаш по првиот потрес и дека точната причина за последователната експлозија се уште не е позната.

Неколку сообраќајници исто така се тешко оштетени во земјотресот, а големи пукнатини има на главните автопатишта, што довело до сообраќајни метежи.

Јапонија се наоѓа во таканаречениот „Огнен прстен“, област во Тихиот Океан што опфаќа вулкани и океански ровови на каде се регистрирани петтина од светските земјотреси со јачина од шест или повеќе степени.

Силниот земјотрес што го потресе Кумамото пред десет години усмрти 275 лица, а 2.739 беа повредени. Тогаш беа оштетени илјадници објекти, меѓу кои и ѕидовите на Градскиот замок, една од најважните туристички атракции во регионот.