Николоски: Во август јавни презентации на студиите за брзата пруга, изградбата стартува на крајот на годинава

Одлично се одвива подготовката за изградба брзата пруга на Коридор 10, следуваат јавни презентации за студиите по што следува изработка на договорите за финансирање и за изведба и презентација на условите за финасирање пред Собранието, информира денеска вицепремиерот и министер за транспорт Александар Николоски. 

Тој потврди дека рокот за старт на работите останува  крајот на годината, како што изјави претходно премиерот Христијан Мицкоски. 

- Одлично се одвива подготовката за изградба на Коридор 10. Изработката на еколошката  студија и студијата за влијание  врз социјалната средина е готова. На почеток на август ќе има јавни презентации, ќе има најмалку четири - во Скопје, Велес, Демир Капија и во Гевгелија  каде што ќе може локалното население да се запознае. Се работи навистина за квалитетен документ од скоро 1600 страници којшто ги опфаќа сите аспекти. После тоа на него се прави ревизија, односно се вклучуваат коментарите на локалното население и согласно договорот којшто го имаме, до 31-ви август оваа работа треба да биде завршена, по што би влегле во конкретизирање и пишување на договорите за финансирање на проектот и за изведба на проектот. Се е според планот како што најавив - изјави Николоски, на новинарско прашање при посетата на општина Кисела Вода. 

Прашан за детали околу финасирањето, укажа дека согласно со домашните закони условите ќе бидат  јавно презентирани во Собранието и оти дотогаш не може да се споделуваат со јавноста.

МИА