Автомобилската индустрија стабилна и покрај светските текови

Автомобилската индустрија во Македонија која вработува околу 30.000 луѓе кои работат во дваесеттина странски инвестиции од овој сектор обезбедува 50% од вкупниот македонски извоз. Засега оваа гранка е стабилна, но поради тоа што само во јануари пазарот во ЕУ на нови автомобили бележи пад од 20%, познавачите од оваа област велат дека ако продолжи овој тренд можеби нема да има отпуштања од работа кај нас, но со сигурност нема да има нови вработувања во овие фабрики, а секако дека дел од вработените би можеле да бидат пуштени и на принуден одмор.

Засега овој сектор се покажа како доста отпорен на целата оваа криза. Прилепски „Гентерм“ досега вработи околу 2.200 лица, иако оваа бројка требаше според договорот со Владата да ја постигне во 2024. Сепак сега не знаат како оваа криза ќе влијае понатаму врз нивната работа.

„Ги зголемуваме нашите производствени количини од година во година, а се зголемува и бројот на вработени. Во моментов компанијата брои над 2.000 вработени. Се надеваме дека бизнис климата ќе остане поволна и во иднина за да ни овозможи да продолжиме да растеме со ова темпо“, рече Андриј Хафинетс - директор на „Гентерм“.

Директорот на ДТИРЗ, Јован Деспотовски, рече дека Владата започнала со промовирање на еден нов, подинамичен и понепосреден контакт и комуникација со инвеститорите за да сите можни проблеми се решавале на побрз начин.

„Овој нов квалитет во нашите односи, во односите на Владата со инвеститорите ќе продолжи и понатаму. Новиот квалитет го гледаме и во тоа што ги поттикнуваме компаниите не само да ги исполнуваат своите инвестициски планови туку да одат и побрзо со исполнување на роковите и во смисла на обем на инвестиција и во смисла на работни места, па дополнително она што е исто така многу важно и во смисла на зголемување на платите“, истакна, Јован Деспотовски - директор на ДТИРЗ.

Дополнителни проблеми и пад на нарачките во оваа индустрија може да предизвика и недостигот на микропроцесори на светско ниво. Но како ќе се одвива целата ситуација ќе се знае во наредните неколку месеци.