Никој не разговарал со грчките власти за рокот на важност на патните исправи

Премиерот и претседателот си ја префрлаат обврската за разговор со грчките власти за продолжување на важноста на патните исправи. На помалку од еден месец до крајниот рок за замена, граѓаните се уште не знаат дали ќе може да патуваат надвор од државата со документи на кои е името Република Македонија. Премиерот Ковачевски вели, патните и лични исправи кои се употребуваат во земјава, ќе важат и по 12 февруари, но, за надворешна употреба треба согласност од Грција. Тој не разговарал со властите во Атина, бидејќи како што појасни, таква обврска имал претседателот Пендаровски.

„Сме се обврзале како држава во февруари дека документите за надворешна употреба ќе бидат со новото уставно име на државата. Со грчките власти немам разговарано, тоа претседателот на државата нели презеде обврска да се слушне со претседателката на Грција. Имаме разговори кои што се водат со ресорните министри“, изјава Димитар Ковачевски, премиер.

Од кабинетот на Пендаровски појаснуваат дека идејата да се побара од Грција продолжување на важноста на патните исправи била негова, ама тој немал право да дејствува.

„Таа процедура е во целосна надлежност на Владата и Собранието. Во однос на комуникацијата со Грција, претседателот Пендаровски може да помогне во процесот, но нема преземено обврска во таа смисла“, велат од Кабинетот на претседателот Стево Пендаровски.  

Во меѓувреме, Уставниот суд ги оформува предметите за преиспитување на законите за промена на патните исправи иницирани од опозициската ВМРО-ДПМНЕ. За нив премиерот Ковачевски вели дека не ги отфрла, но последниот збор го имал судот. Со иницијативата се оспоруваат законите за безбедност на сообраќајот и патни исправи, кои според ВМРО-ДПМНЕ се спротивни на Уставот. Од партијата напишале дека замената на важечки документи е прекршување на правниот принцип.

„Неможноста на граѓаните кои уредно извадиле важечка патна исправа пред стапување во сила на законот, да ја користат до крајот на нејзината важност декларирана на самата исправа, ги става во нееднаква положба сите граѓани“, се вели во иницијативата на ВМРО-ДПМНЕ.   

Од Уставен велат не може да се прецизира датум кога важноста на пасошите ќе се најде на седница. По прибирање на сите потребни информации, предметот ќе бил предложен за дискусија пред уставните судии.