Уставен бара мислења од Влада и Собрание за промената на патните исправи

Хаосот со замената на личните и сообраќајни исправи е под лупа на Уставен. Пред судот има иницијативи за стопирање на рокот 12 февруари, кој ги направи неважечки овие документи. Се бара Уставен да потврди и прекршување на слободата на граѓаните заради неможноста да ја напуштат државата. Според информации од судот, активно се работи на предметите - побарани биле мислења, се анализирала и уставно-судската пракса.

Според иницијативите поднесени од ВМРО-ДПМНЕ, промената на документите е дикриминирачка за граѓаните. Ги менувале патните и сообраќајни исправи, иако нивната важност не била истечена.

„Државата сама го декларирала рокот на истекување на важноста на патните исправи на печатените обрасци во моментот на издавање на секоја патна исправа, за потоа со закон истиот да го измени на директна штета на граѓаните. Истекувањето на рокот на важност порано од декларираниот рок на документите од страна на државата, ги става граѓаните во состојба на изгубена правна заштита и правна сигурност“, се вели во иницијативата на ВМРО-ДПМНЕ. 

Во меѓувреме, со друга иницијатива се бара Уставниот суд да утврди прекршување на правата и слободите заради ограниченост на движењето на граѓаните. Струшки адвокат смета дека недозволиво било и по две години од потпишувањето на Преспанскиот договор, МВР да издава пасоши со Република Македонија кои сега се неважечки, а граѓаните не можат да излезат од државата.

„Генерално, прекршено е правото на слободно движење и во овој дел, сите оние граѓани кои извадиле пасоши по стапување во сила на Преспанскиот договор, но со стари обрасци се доведени во една навистина тешка ситуација, односно, ограничени се во голем дел, значително во остварување на своето уставно загарантирано право. Сметам дека Министерството со ваквите дејствија не дискриминирало на некој начин бидејќи сум ги поминал истите процедури како и другите кои извадиле пасош во втората половина на 2021 година, но јас не можам да го користам уставно загарантираното право да патувам надвор од државата и да се вратам“, изјави Глигорие Ќатоски, адвокат.

Нарушување на правната сигурност на граѓаните препознава и Комисијата за спречување и заштита од дискриминација. Потфрлил процесот на замена, па загрозени биле правата на слободно движење, работа и здравствена заштита.