Анализа на американското разузнавање: Путин е порешителен од кога било досега

Најновата проценка на американските разузнавачки агенции покажува дека Русија не покажува знаци на компромис околу војната во Украина.

Во меѓувреме, американскиот претседател Доналд Трамп се обидува да посредува во мировни преговори, изјавија високи американски и конгресни претставници.

Анализата, презентирана пред членовите на Конгресот претходно овој месец, покажа дека рускиот претседател Владимир Путин е „порешителен од кога било“ да ја продолжи војната и да постигне победа на бојното поле, објави Ен-Би-Си.

Според разузнавачките агенции, Путин сега е „подлабоко вкоренет“ во својата стратегија отколку во претходните фази од конфликтот.

Официјалните лица изјавија дека и покрај големите загуби меѓу руските сили и економските проблеми дома, Москва останува фокусирана на проширување на своето воено присуство на украинска територија за да ги оправда жртвите и трошоците од војната.

Во знак на растечка фрустрација, претседателот Трамп минатата недела го откажа планираниот состанок со Путин во Будимпешта и ги воведе првите економски санкции против Русија откако ја презеде функцијата во јануари.

Санкциите се насочени кон две големи руски нафтени компании.

Белата куќа одби да ги коментира деталите од разузнавачката проценка, повикувајќи се на јавните изјави на Трамп за напорите за постигнување мировен договор.

Комбинацијата од нови санкции, украински напади со беспилотни летала врз руски енергетски објекти и зголемена воена помош од Западот на крајот би можела да влијае на пресметките на Кремљ, според европски дипломати и поранешни американски разузнавачки службеници. 

МИА