Мицкоски со серија средби во Њујорк: Во фокус европската интеграција, безбедноста и регионалната соработка

Претседателот на Владата, Христијан Мицкоски, во рамките на посетата на Њујорк оствари повеќе билатерални средби со високи претставници, на кои беа разменети мислења за европската перспектива на земјата, регионалната соработка, безбедноста и за актуелните глобални предизвици.

Како што соопштија од Владата, премиерот Мицкоски во текот на вчерашниот ден остварил средба со претседателот на Република Финска, Александар Стуб, со кого разговарале за значењето на мирот, дијалогот и одговорното лидерство, како и за почитувањето на меѓународното право и зајакнувањето на мултилатералната соработка. На средбата, се додава, била истакната и важноста од заеднички напори за градење стабилна и безбедна Европа.

Фокус на билатералната средба со премиерот на Република Косово, Аљбин Курти, било унапредувањето на добрососедските односи, продлабочувањето на регионалната соработка, како и заедничките предизвици и можности за развој на двете држави.

- Претседателот Мицкоски остварил билатерална средба и со премиерот на Република Хрватска, Андреј Пленковиќ, на која беа разменети мислења за европската перспектива на Македонија, продолжувањето на реформските процеси во согласност со европските стандарди, унапредувањето на добрососедските односи и зајакнувањето на регионалната соработка - стои во соопштението.

Премиерот Мицкоски исто така остварил средба и со високата претставничка на Европската Унија за надворешни работи и безбедносна политика, Каја Калас, на која биле разгледани актуелните регионални предизвици, можностите за понатамошно зајакнување на соработката и заедничките приоритети насочени кон стабилен и безбеден регион.

Средбите во Њујорк ја потврдуваат определбата на Македонија за активна и конструктивна улога во меѓународната заедница, зајакнување на партнерствата и продлабочување на соработката со европските и регионалните партнери.
Македонија останува посветена на реформите, европската интеграција, добрососедските односи и градењето стабилен, безбеден и просперитетен регион, наведуваат од владината прес-служба. 

МИА