Над 350 документи и услуги достапни преку центрите за услуги

До крајот на годината, министерството за дигитална трансформација планира да ја заокружи мрежата од 20 центри за услуги низ државата. Целта е граѓаните да добиваат различни документи и да користат електронски услуги на едно место, без притоа да посетуваат повеќе институции за да ги завршат административните обврски. За идната пролет се најавува и кампања со мобилни единици, односно специјално опремени комбиња кои ќе овозможат административни услуги и помош при користењето на електронскиот портал директно во руралните средини.

Преку овие центри, граѓаните добиваат пристап до околу 350 електронски услуги. Меѓу нив се изводи од матичните книги, уверенија за државјанство, потврди за неосудуваност, услуги од катастарот и централниот регистар, како и потврди за пензиски стаж.

Од Министерството најавуваат дека дигиталната трансформација нема да запре тука. Целта е до крајот на владиниот мандат услугите да стигнат до сите граѓани во државата. Во меѓувреме, планирани се и едукативни кампањи и обуки за користење на електронските услуги.