Обрадовиќ: Честитки за играчите и навивачите за освоената АБА титула

Тренерот на белградски Партизан, Жељко Обрадовиќ, истакна синоќа дека заслугата за освоената титула во регионалната АБА лига им припаѓа на неговите кошаркари и армијата навивачи на „црно – белите“.

Партизан ја освои титулата откако во решавачкиот петти натпревар пред повеќе од 22.000 гледачи во белградската Штарк Арена триумфираше над градскиот ривал Црвена ѕвезда со 96-85.

„Ќе почнам со тоа што мене лично ми причинува најголемо задоволство, а тоа е дека натпреварот беше одигран во фантастична атмосфера и оти навивачите на Партизан вечерва станаа шампиони во секоја смисла“, рече Обрадовиќ на прес – конференцијата по натпреварот.

За Партизан ова е седма титула во АБА лигата и прва од 2013 година.