Опасна граната тешка околу 45 килограми пронајдена кај Неготино

Дирекцијата за заштита и спасување (ДЗС) успешно реализираше интервенција за безбедно отстранување неексплодирана артилериска граната од 155 милиметри, тешка околу 45 килограми, што потекнува од Првата светска војна. Oпасната граната беше пронајдена во атарот на селото Пепелиште, општина Неготино, соопштија утрово од ДЗС.

- Поради непристапниот терен и локација на неексплодираното убојно средство во коритото на реката Вардар, интервенцијата беше реализирана во сложени услови. Со логистичка поддршка од Територијалната противпожарна единица - Неготино, којашто обезбеди чамец за пристап до локацијата, а пиротехничарот на ДЗС, Ѓорѓи Стефанов, безбедно ја извлече гранатата, по што таа беше транспортирана и обезбедена до нејзиното конечно уништување на армискиот полигон „Криволак“ - информираа од ДЗС.

Оттаму упатија благодарност до ТППЕ - Неготино за професионалната соработка и навремената поддршка.

Се апелира доколку се пронајдат и забележат сомнителни експлозивни средства, да не се допираат и поместуваат, туку веднаш да се пријават на 112 - единствениот повикувачки бесплатен број за итни случаи. 

МИА