Османи ќе се обрати на Специјалната итна седница на Генералното собрание на ОН

Министерот за надворешни работи Бујар Османи денеска ќе се обрати на 11. Специјална итна седница на Генералното собрание на ОН во Њујорк. 

Османи во обраќањето пред ГС на ОН ќе стави акцент на воената агресија на Русија врз Украина, со барање да запре војната и страдањата на луѓето, а ќе се осврне и на главните приоритети и досегашните активности во реализирањето на Програмата на претседавањето на Северна Македонија со ОБСЕ во 2023, особено на зголемувањето на сигурноста и безбедноста на граѓаните, во контекст на нашето мото „За луѓето се работи“, имајќи ги предвид состојбите и во други земји на ОБСЕ регионот. 

Од Кабинетот на министерот најавуваат дека тој ќе реализира и билатерални средби со министрите за надворешни работи на Естонија, Унгарија и Холандија, како и со потсекретарот на Обединетите нации за политичко-безбедносни работи Розмари Ди Карло. Планирани се средби и со претставници на дијаспората на Северна Македонија во САД.