Пакистан бомбардираше складиште за гориво во близина на аеродромот Кандахар во Авганистан

Пакистанската војска бомбардираше складиште за гориво на приватната авиокомпанија „Кам Ер“ во близина на аеродромот Кандахар во Авганистан, соопштија денеска Талибанците.

Портпаролот на Талибанците, Забихулах Муџахид, изјави дека складиштето снабдува гориво за цивилни авиони и авиони на Обединетите нации и дека бомбардирањето, исто така, погодило цивилни домови во други области, вклучувајќи го и Кабул, при што загинаа жени и деца.

Талибанците додадоа дека „агресијата нема да остане без одговор“.

Во последните денови нема пријавени воздушни напади од страна на Пакистан, а копнените борби по должината на границата од 2.600 километри се намалија.

Пакистан вели дека Авганистан им обезбедува засолниште на милитантите кои ја напаѓаат неговата територија, додека Талибанците ги отфрлаат тврдењата, велејќи дека милитантноста е внатрешен проблем на Пакистан.

Напорите за посредување од страна на Кина, која повика на прекин на насилството, помагаат во смирувањето на конфликтот меѓу двете земји.

Пакистан и Кина се вклучени во „процес на дијалог“ за Авганистан, според портпаролот на пакистанското Министерство за надворешни работи, Тахир Андраби.