Пакистан и Иран постигнаа „значителен напредок“ во разговорите за ставање крај на конфликтот

Пакистан и Иран постигнаа „значителен напредок“ во разговорите насочени кон војната меѓу САД и Израел против Иран и изнаоѓање пат кон мир, изјави денеска пакистанскиот министер за внатрешни работи, Мохсин Накви, по завршувањето на посетата на Техеран.

Во пакистанската делегација беше и командантот на армијата Асим Мунир. Разговорите биле насочени кон мерки за спречување на натамошна ескалација, повторно отворање на Ормускиот Теснец и забрзување на завршувањето на конфликтот, соопшти пакистанската армија по средбата на Мунир со иранското раководство.

Двете страни размениле мислења и за регионалниот мир и начините за постигнување договорно решение на спорот, се наведува во соопштението.

„Иранскиот претседател отворено го изнесе ставот на неговата влада, а имавме многу конструктивна размена на мислења за прашањата за кои станува збор“, напиша Накви во објава на социјалната мрежа „Икс“.

Мунир пред посетата на Техеран разговарал со американскиот претседател Доналд Трамп, беше соопштено вчера. Според Ројтерс, Трамп побарал од Пакистан да го искористи своето влијание за да го поттикне Иран да се врати на преговорите.

Трамп минатата недела предупреди на економски последици за секоја земја која му обезбедува „каква било помош“ на Иран, во рамки на неговите напори за изолирање на земјата.

Иран, пак, се закани дека ќе го запре целиот извоз на нафта од земјите од Заливот, што дополнително ги зголеми тензиите во регионот.