Перпарим Бајрами излегува од притвор со гаранција од 1 милион евра

По Артан Груби, од притвор излегува и Перпарим Бајрами, кој заедно со поранешниот вицепремиер е обвинет за злоупотреби во Државната лотарија, со штета од речиси 10 милиони евра.

Кривичниот суд ја прифатил гаранцијата на поранешниот директор на Лотарија, во недвижен имот вреден 1 милион и 140 илјади евра, и правосилно му го укинал притворот. За да се обезбеди неговото присуство во судската постапка, Бајрами ќе мора редовно да се јавува во судот, а патната исправа му е одземена и нема да може да добие нова за преминување на државната граница.

Од судот информираат дека Бајрами ќе биде ослободен од затворот „Скопје“ откако гаранцијата ќе биде обезбедена со впишување хипотека во Катастарот на недвижности.

Бајрами во притвор се наоѓа од 9 септември, кога сам се пријави во затворот, по повеќе од 19 месеци бегство и недостапност за органите на прогонот.

Тој е обвинет за злоупотреба на службената положба и овластување во случајот со набавката на видеолотариските терминали, заедно со поранешниот вицепремиер Артан Груби и тогашниот генерален секртар на Владата.