По падот на Вучиќ - политички реакции во Македонија, проверки и апсења во Србија

Меѓу првите што му ја честитале изборната победа на носителот на Студентската листа бил и премиерот Христијан Мицкоски. По политичкиот пресврт во Србија и поразот на Александар Вучиќ, Мицкоски очекува промената на власта во Белград да не се одрази врз односите меѓу двете земји, туку да продолжат добрососедската соработка и економскиот развој.

Во меѓувреме, на обвинувањата од македонската опозиција за неговата политичка блискост со поранешниот српски претседател, премиерот порачува дека нема да одговара со навреди, туку со конкретни проекти и резултати.

Од опозициската СДСМ бараат Обвинителството и Народната банка итно да испитаат дали преку српската Алта банка се префрлаат пари од поранешниот режим на Вучиќ на сметки во Македонија. Повикувајќи се на информации објавени во српските медиуми, од партијата се сомневаат дека станува збор за криминални пари и го отвораат прашањето дали Мицкоски овозможил вакви трансакции.

Во меѓувреме, по изборниот пораз на Вучиќ, во Србија започна сеопфатна контрола на работата на сите 87 јавни обвинителства во земјата. По наредба на Врховното јавно обвинителство, петчлена комисија денеска влезе во Вишото јавно обвинителство во Белград, каде што се проверува дали одредени предмети со години биле чувани во фиоки, без да се постапува по нив, а се проверуваат и спогодбите за признавање вина.

Немања Ѓуриќ од Студентската листа изјави дека доколку се утврдат незаконитости, би можеле да следуваат постапки и против самите обвинители. Тој очекува во наредните денови и апсења на високи државни функционери, но порачува дека целта не е еден политички притисок врз правосудството да се замени со друг, туку институциите да работат независно.

Паралелно со контролите, во Нови Сад е уапсен и поранешен началник на Градската управа за стопанство, осомничен за злоупотреби и пропусти при контролата на 126 проекти, со што градскиот буџет бил оштетен за околу 710 илјади евра.